Sakabanaketarekin amaitzea eskatu dute Iturrama eta Oreretako hainbat gaztek espetxeetara egindako martxan

Leongo eta Valladolideko kartzeletan izan dira asteburuan Iturrama eta Oreretako hainbat gazte, preso dauden euskal reso politikoei babesa helarazi eta dispertsioarekin amaitzea eskatzeko: “Garrasi egin genuen, kantatu genuen, txalo eta txistu, ahal izan genuen indar guztiz, gure kideen belarrietara gure hitzak iritsi zitezen. Beraiekin gaudela esateko”.

Valladolideko espetxearen kanpoaldean

Bide horretan, Espainia eta Frantziako Gobernuei ohartarazi die Euskal Herriak “bide politiko berri bati” ekin dion honetan, beharrezkoa dela espetxe politikan urratsak ematea: “Euskal jendarteak ez du ulertzen gaixorik dauden presoak ez etxeratzea. Ez du ulertzen senide eta lagunen zigor bilakatu den dispertsioak etenik ez izatea”.

Iturrama eta Oreretako lagunen kronika:

Larunbatean, Leongo eta Valladolideko espetxeetara eraman nahi izan genituen Euskal Herriko oihu eta aldarrikapenak. Garrasi egin genuen, kantatu genuen, txalo eta txistu, ahal izan genuen indar guztiz, gure kideen belarrietara gure hitzak iritsi zitezen. Beraiekin gaudela esateko. Beraietaz harro eta beraien ondoan. Elkartasunak ez baitu ulertzen porlanezko hormez eta barrote beltzez. Elkartasunak, txori hegalarien lez, haizearen laguntzaz bilakatuko dituelako gure hitzak haien ziegetako berotasunean. Ahazten ez duen herrria delako gurea, azkeneko presoa etxean ikusi arte borrokatzeari uztiko ez dion herria.

Goizeko ordu txikitan hartu genuen autobusa, egun batez gure kideen senide eta lagunen azalean jarriaz, errepide luzean barrena kilometroak egiteko prest. Euskal Herrian ateri zegoen, baina zalantza izan genuen, Espainiako errepideetan euria ariko zuen ala ez. Bidean zehar hitz egin genuen, barre, jan eta lo. Batzuek urduri joan ginen, bixitan nola aurkituko genituen pentsatzen. Besteak amorratuta, haiengandik horren gertu egon eta ikusteko aukerarik ez izateak sortzen duen inpotentzia dela eta. Baina guztiok indartsu, argi baitugu borroka honetan irabazteko jaioak garela!

Ez genuen martxa amaitu nahi Espainiako eta Frantziako gobernuei mezu argi bat helarazi gabe: nahiko da! Euskal Herriak bide berri bati ekin dion honetan, beharrezkoa da espetxe politikan urratsak ematea. Euskal jendarteak ez du ulertzen gaixorik dauden presoak ez etxeratzea. Ez du ulertzen senide eta lagunen zigor bilakatu den dispertsioak etenik ez izatea. Ozen diogu euskal preso eta iheslariak etxean nahi eta behar ditugula borroka honetan aurrera egin nahi badugu. Gure herria ez baita aske izango inoiz haiek gabe. Eta are ozenago diogu, espetxeetatik azken presoa kaleratu arte, gure borrokak ez duela etenik izango. Amnistiaren bidean, preso eta iheslariak etxera! Sakabanaketarekin amaitu!

DISPERTSIOAREKIN AMAITZEKO DENAK ALA INOR EZ!!!