EPPK-ko presoek kexak aurkeztuko dituzte, sakabanaketa salatzeko
Lehen fasean, 50 preso inguruk aurkeztuko dute kexa, bakarka. Nork bere eskaria aurkeztuko du, kasu pertsonala azalduz eta zein giza eskubide urratu zaizkion adieraziz. Sakabanaketa salatzearekin batera, Euskal Herriko espetxe batera lekualdatzeko eskatuko dute. Aurrerago litekeena da preso gehiagok erabiltzea bide hori.
EPPK-k orain arte erabili ez duen baliabide bat izango litzateke. Iazko abenduan, EPPK-k jakinarazi zuen "lege baliabideak" erabiliko zituela "etxeratzeko" bidean. Martxoan hasi ziren eskaera horiek aurkezten, baina ezezkoa jaso dute.
Agerraldia egin du EH Bilduko Julen Arzuaga parlamentariak, euskal presoen urratsa baloratzeko. Adierazi duenez, oraingo erabakia iazko abenduan EPPK-k egindako adierazpenaren ondorio zuzena da. Alde horretaitk, presoak "emandako hitza betetzen" ari direla nabarmendu du Arzuagak. Gainera, era horretako pausoak politika eremutik "babestu" eta "lagundu" behar direla esan du. Era berean, presoen sakabanaketa salatu du, "indarkeria, sufrimendua eta mina dakarren inposizioa" delako. Bertan behera uzteko deia egin du, "herri honen gehiengoak" hala eskatzen duelako.