Haizpea Abrisketa auzipetua politika egiteagatik
Azaroaren 23an hasi behar zen ezker abertzaleko 35 militanteren kontrako epaiketa, baina abenduaren 3ra gibelatu dutela azaldu dute. Estatu espainiarreko Audientzia Nazionalean epaituak izanen diren kideen artean Aurore Martin eta Haizpea Abrisketa atzemanen dira.
Oroitarazi behar da iragan den azaroaren 6an Ipar Euskal Herriko hainbat arlotako 22 eragilek sostengua adierazi dietela Madrilen epaituak izanen direnei. Horiek babesa irudikatzeko elkarretaratze bat antolatuko dute azaroaren 13an Baionan.
Makroepaiketan epaituak izanen direnek sei eta hamar urte bitarteko kartzela zigorra arriskatzen dute. Hain zuzen ere, beren aktibitate politikoarengatik, prentsaurrekoetan eta bilkura publikoetan parte hartzeagatik, edota iritzi artikuluak idazteagatik epailearen aitzinean pasatu beharko dira.(kazeta.info)